शुक्लाफाँटा राष्ट्रिय निकुञ्जमा ६० वटा कृतिम ताल हुदै

भीमदत्तनगर,  चैत : वन्यजन्तुको पानीको प्यास मेटाउन कञ्चनपुरको शुक्लाफाँटा राष्ट्रिय निकुञ्जमा ६० वटा कृतिम ताल (पोखरी) निर्माण हुदैछन ।
वन्यजन्तुको वासस्थापन संरक्षण तथा गर्मीयाममा निकुञ्जभित्र भएका प्राकृतिक तालमा पानी कम हुने भएकाले निकुञ्जको विभिन्न क्षेत्रमा चालु आर्थिक वर्षमा ६० वटा कृतिम ताल निर्माण हुने शुक्लाफाँटा राष्ट्रिय निकुञ्ज कार्यालयले जनाएको छ ।

ताल निर्माणका लागि रु एक करोड २० लाख रकम समेत केन्द्रबाट विनियोजन गरिएको शुक्लाफाँटा राष्ट्रिय निकुञ्जका प्रमुख संरक्षण अधिकृत लक्ष्मण पौड्यालले जानकारी दिनुभयो ।

विभिन्न समयमा गरेर निकुञ्जको शुक्लाफाँट, अर्जुनी क्षेत्र, पिपरिया, सिंहपुरलगायतका क्षेत्रमा हालसम्म ३४ वटा ताल निर्माण भइसकेका छन् ।
३०५ वर्गकिलोमिटर क्षेत्रफलमा फैलिएको निकुञ्जमा रहेका रानी ताल, बाबा ताल, बठनीयालगायतका प्राकृतिक ताल संरक्षण हुनसकेका छैनन् ।

सरसफाइको अभावले तालमा जलकुम्भीलगायतले पुरिँदै गएका छन् । ‘वन्यजन्तुका लागि पानीको अभाव नहोस् भनेर ठाउँ÷ठाउँमा पोखरी बनाउन लागिएको हो ।’ प्रमुख संरक्षण अधिकृत पौड्यालले रासससित भन्नुभयो,“चालु वर्षभित्र रहेका प्राकृतिक ताल पनि सरसफाइ गर्ने योजना छ ।”
उहाँले निकुञ्जभित्रको रानीताल सरसफाइका लागि रु २० लाख बजेट आएको जानकारी दिनुभयो ।‘ताल सरसफाइका लागि ठेक्का प्रक्रिया समेत भइसक्यो ।’ उहाँले भन्नुभयो,“वन्यजन्तु अवलोकनका लागि तीन वटा स्थानमा भ्यूटावर बन्दैछन ।”

शुक्लाफाँटामा १७ वटा गैँडा, १६ वटा पाटे बाघ, दुई हजार ३०० को हाराहरीमा बाहसिङ्गा र सयौं प्रजातीका सङ्ख्यामा चराचुरुङ्गी रहेका छन् ।


Facebook Comment


No ads found for this position