अस्ट्रेलियाको बिद्यार्थी भिसा शुल्कमा बृद्धि
अष्ट्रेलिया सरकारले केही समय अघि विद्यार्थी भिसाको लागि नयाँ नियम ल्याएको छ ।
नयाँ नियम लागू भएसँगै विद्यार्थी भिसा शुल्कमा समेत वृद्धि गरेको छ । तर यो नियम कसलाई लागू हुने भन्नेबारेमा भने अझै धेरै विद्यार्थीहरुमा अन्यौल रहेको पाइन्छ ।
अर्थात बढेको शुल्क अब नयाँ विद्यार्थीहरुका लागि लागू हुने हो कि अहिले विद्यार्थी भिसा लिइरहेका सबै विद्यार्थीले बढेको शुल्क तिर्नुपर्ने हो भन्ने थाहा पाउन नसक्दा धेरै विद्यार्थीहरु अलमलमा परेका हुन् । झन् त्यसमाथि इमिग्रेशनको कार्यालयबाट बोलेको भन्दै फोन गरि बढेको शुल्क तिर्नुपर्ने जानकारी आउन थालेपछि अष्ट्रेलियामा अध्ययनरत विदेशी विद्यार्थीहरु अन्यौलमा परेका छन् । त्यसरी फोन गर्नेहरुले ७०० डलर शुल्क तिर्नुपर्ने जानकारी दिने गरेको पीडितहरु बताउँछन् ।
तर इमिग्रेशन कानूनका जानकारहरुका अनुसार अष्ट्रेलिया सरकारले लागू गरेको नयाँ नियमले विद्यार्थी भिसाको शुल्क बढाएको साँचो भए पनि यो पहिले नै अष्ट्रेलिया आएर अध्ययन गरिरहेका विद्यार्थीहरुलाई भने लागू नहुने प्रष्ट पारेको छ ।
त्यसैले बढेको शुल्क तिर्न भन्दै आउने कलहरु ठगी गर्ने नियतले आएको हुनसक्ने भन्दै सचेत रहन अपिल गरेका छन् । त्यस्तो कुनै कल आए १८००००९६२३ मा सम्पर्क गरेर आफू र अरुलाई पनि ठगिनबाट जोगाउन विज्ञहरुको सुझाव छ ।